Trayekto di
bakunashon

Bo ta kla pa risibí e bakuna i boostershot?

  • E bakuna ta GRÁTIS
  • E bakuna NO ta obligatorio

Aktualmente na Kòrsou nos ta usa BioNTech/Pfizer i Moderna.

A kuminsá e trayekto di bakunashon na Kòrsou, djárason 24 di febrüari 2021 i lo sigui bakuná komunidat te dia mester. Ademas di esei a kuminsá ku e trayekto di boostershot.

Durante e trayekto di bakunashon lo hasi uso di diferente lokalidat komo Sentro di Bakunashon. Aktualmente ta bakuná solamente na SEHOS-POLI, ku sita (boostershot, promé i di dos bakuna) òf komo ‘walk-in’ (promé i di dos bakuna so).

Sentro di Bakunashon:

SEHOS-POLI | aktivo
Ta bakuná 5 dia pa siman.
Orario: 8:30’or di mainta pa 5:30’or di atardi.

Dianan di bakunashon:
Riba djamars, djaweps i djabièrnè pa boostershot.

Riba djárason i djasabra pa promé i di dos bakuna.

Tur hende ku ta deseá por bakuná. Ku eksepshon di:
– Persona ku alergia severo pa un di e komponentenan den e bakuna

Personanan ku e siguiente kondishonnan tambe por haña e bakuna:
– Asma
– Diabetes
– Obesidat
– Preshon haltu
– Malesa króniko
– Ta dialisá
– Problema ku kolesteròl
– Ta bebe remedi pa hasi sanger delegá (antistolling medicatie)

Kon ta registrá pa bakuná:

Por yama 9345 pa informashon i registro pa bakuná òf por klek akí pa bai na e portal digital pa registrá

Helpdesk 9345 ta aksesibel: di djaluna pa djasabra di 8’or di mainta nòn-stòp te 5’or di atardi. Yamada ta grátis!

Informashon tokante boostershot:

Tempu entre e promé (dos) bakuna i e booster shot

Mester tuma e boostershot un mínimo di 3 luna despues di a risibí e delaster (dos) bakuna. Bo a haña Corona despues di a risibí bo (dos) bakuna(nan)? E ora ei bo mester konta 3 luna entre e momento ku bo a keda kontagiá ku Corona i ora ta bai tuma e boostershot.

Diferensia entre e di tres prek i e boostershot

E di tres (prek di) bakuna ta pa personanan ku tin problema ku nan mekanismo di defensa (p.e. pashèntnan ku un sistema inmunológiko defisiente) komo parti di nan bakunashon básiko. Sierto di e pashèntnan akí mester di e di tres bakuna pa por ta bon protehá kontra malesa severo òf morto pa motibu di Corona. Pero tin sierto pashènt tambe ku ainda no lo ta bon protehá kontra di COVID-19 despues di a risibí e di tres bakuna. Serka ken esaki lo ta e kaso no ta fásil pa premirá. Por risibí e di tres bakuna solamente pa medio di un karta di e dòkter ku ta trata bo òf spesialista.

Pa mayoria di e otro personanan e bakunashon básiko ta konsistí di 1 òf 2 prek. Esaki ya ta duna bo un protekshon optimal segun e tempu ku e bakuna tin su efekto. Esaki ta pone ku e di tres prek pa pashèntnan ku un sistema inmunológiko defisiente ta desviá un poko for di e boostershot pa restu di hende.

Boostershot den forma di e bakuna di mRNA

Tur persona ku ta bini na remarke pa un boostershot lo risibí esaki den forma di e bakuna di mRNA: BioNTech/Pfizer. Esaki fuera di e tipo di bakuna ku bo a risibí anteriormente.

Boostershot i prueba di bakunashon

Bo prueba di bakunashon i DCC por lo pronto ta keda vigente ounke bo risibí un boostershot. Esaki por kambia den futuro.

Bo tin kualke pregunta òf bo tin duda? Kòmbersá ku bo dòkter di kas.

Karchi di bakuna
Definishon di persona kompletamente bakuná

Ta konsiderá un persona kompletamente bakuná, si den su karchi di bakunashon tin: Dos (2) steker di bakunashon huntu ku badgenummer i paraf di GMN òf Un (1) steker di bakunashon huntu ku badgenummer i paraf di GMN; adishonalmente e persona akí tin un anotashon ku ta indiká ku e ta kompletamente bakuná debí na un infekshon resien di COVID-19.

Tur hende ku tin un karchi di bakunashon di Kòrsou, por traha un prueba digital (DCC) ku un QR-code. Esaki ta konta komo prueba ora bo ke drenta un evento di riesgo haltu òf pa biaha bai un otro pais. Klek aki pa traha bo DCC. 

© 2021 BIBANDO | Gobièrnu di Kòrsou | Privacy Policy | Cookie Policy