E Bakuna

Dikon e Bakuna

Tin hopi motibu pa risibí e bakuna. E ta duna bo e oportunidat pa biba bo bida na un manera mas fásil. E ta un paso riba e kaminda pa bo mes krea bo normal nobo, reinventando bo mes libertat, bibando bida den bo mes ritmo, mas tantu posibel. Naturalmente, bo tin bo preguntanan tokante bakunashon. Aki bo ta haña kontesta riba mayoria di esakinan. Pa informashon tokante e proseso di registrashon pa haña e bakuna, klek riba Trayekto di Bakuna.

Benefisionan di e bakuna
E bakuna akí, ta protehá un persona kontra e vírùs di Corona nobo (SARS-CoV-2). Esaki no ta nifiká ku bo no por haña COVID-19. Si bo keda kontagiá ku e vírùs, despues di a risibí e bakuna, bo no ta haña (dje tantu) keho i e chèns pa keda hospitalisá ta baha drástikamente. Ora mas tantu hende na Kòrsou tuma e bakuna, e vírùs ta pèrdè su impakto grandi riba nos bida diario. Mas lihé esaki sosodé, mas liber nos tur por sigui biba, drecha nos ekonomia i yuda tur hende den nos komunidat krese.

E bakuna ta seif?
Aktualmente tin 2 diferente bakuna ku nos ta risibí di Hulanda, e bakuna di BioNTech/Pfizer i e bakuna di Moderna. Rònt mundu, i sigur na Oropa, tin tèstnan hopi profundo riba e bakunanan promé ku nan por a subi merkado. Mientrastantu, miónes di hende rònt mundu ya a risibí e bakuna kaba. Ku esaki, nan ta bibando un bida mas den balansa, mas den ritmo di bida. Na Kòrsou nos a buska informashon debidamente tokante kiko nos ta haña, promé ku duna nos hendenan e bakuna. Siguridat di nos pueblo ta nos máksimo prioridat.

Dikon a bin asina lihé ku e bakuna?

  • Dor ku henter mundu, paisnan pober i paisnan riku, tin problema grandi ku e pandemia di COVID-19, e nesesidat pa un bakuna tabata haltu. No solamente pasó hopi hende ta bira malu i asta pèrdè nan bida, pero tambe pasó COVID-19 a stanka desaroyo i ekonomia di mayoria pais na mundu. El a stroba e balansa den nos bida tambe, dor di e nesesidat pa bini ku medidanan pa protehá komunidat. Pues e diferente paisnan a pone tur konosementu riba e tereno akí huntu, ku resultado ku e bakuna a keda kla muchu mas lihé.
  • Hopi investigashon riba e seguridat i funshonamentu di e bakuna, a keda ehekutá na mes momentu enbes di warda pa ehekutá kada paso despues di e otro. Esaki sigur a hasi un diferensia den tempu.
  • Di e forma akí por a desaroyá i aprobá e bakuna kontra Corona masha lihé sin ku a salta ningun paso importante.

E bakuna akí tin aprobashon pa e Agensia di Medisina Oropeo (EMA). E asina yamá ‘College ter Beoordeling van Geneesmiddelen’ (CGB) tambe ta forma parti di esaki.

Kon e bakuna ta funshoná?
Si akaso bo bini den kontakto ku e vírùs di Corona despues di a haña e bakuna, bo kurpa ya ta rekonosé e vírùs akí. Dor di e bakuna, bo kurpa a produsí e antikuerponan nesesario ku por eliminá e vírùs. Esaki, ta pone ku sea bo no ta bira malu òf bo no ta bira hopi malu.

Dor di bakuná, e chèns pa bo por sigui transmití e vírùs tambe ta mas limitá.

Bo tin mester di 2 bakuna pa bo ta bon protehá kontra e vírus. For di e di 7 dia despues ku bo a risibí e di 2 bakuna, bo kurpa ta protehá kaba kontra e COVID-19.

Investigashon ta mustra, ku e bakuna di BioNTech/Pfizer ta 95% efektivo den prevenshon di e malesa di COVID-19 pa personanan ku risibí 2 dosis (prek) di e bakuna i ku no a infektá promé. Den e kaso di Moderna, e efektividat despues di 2 dosis ta 94%. Esaki ta nifiká, ku for di 100 persona ku por haña COVID-19, 4 pa 5 só ta kore e mesun tantu riesgo despues di a risibí e bakuna aki.

Na ki momentu mi ta risibí e bakuna?
En prinsipio e bakuna di BioNTech/Pfizer ta adekuá pa hendenan for di 16 aña, pero aki na Kòrsou nos ta invitá tur hende for di 18 aña pa haña bakuna. Bo por risibí e bakuna di Moderna tambe na momentu ku bo ta riba 18 aña. Segun investigashonnan internashonal ta sigui tuma lugá, nos tambe lo por konsiderá kuminsa bakuná hóben i muchanan mas yòn tambe.

Bo ta risibí e bakuna 2 bia. Den kaso di BioNTech/Pfizer, bo ta risibí e di dos dosis despues di 3 siman i den kaso di Moderna despues di 4 siman ku bo a risibí esun promé. Bo ta risibí e bakuna akí na e parti ariba di bo brasa.

EFEKTONAN DI BAKUNA
Meskos ku ta e kaso serka tur bakuna, bo por haña efektonan sekundario tambe despues di a risibí e bakuna kontra COVID-19.

Efektonan sekundario importante:
Mayoria di e efektonan sekundario akí, bo ta haña komo ku e bakuna ta sòru pa bo sistema di defensa kuminsá funshoná. Bo sistema di defensa ta e loke tin ku sòru pa protehá bo kurpa kontra COVID-19. Pues, ora bo sistema rekonosé algu di e vírùs den bo kurpa, e ta kuminsá bring’é. I esaki por nifiká ku pa un tempu kòrtiku, bo ta sinti algun efekto un tiki inkómodo. 

For di e promé investigashonnan, e siguiente efektonan sekundario a resultá esnan mas komun:

  • Doló na e lugá kaminda bo a risibí e bakuna (mas di 80%)
  • Kansansio (mas di 60%)
  • Doló di kabes (mas di 50%)
  • Doló di múskulo (mas di 30%)
  • Keintura (mas di 10%) 

E efektonan sekundario akí ta masha komun na momentu ku un persona risibí kualke otro tipo di bakuna tambe. Den mayoria kaso, e efektonan sekundario akí por dura entre 1 pa 3 dia. E efektonan ta pasa lihé, e resultado ta ku nos por biba kuné.

Komponentenan di e bakuna:

  • Klek akí pa bishitá e wèpsait di CBG pa informashon di e komponentenan di e bakuna BionTech/Pfizer.
  • Klek akí pa informashon mas simplifiká di e komponentenan di bakuna BioNTech/Pfizer.

© 2021 BIBANDO | Gobièrnu di Kòrsou | Privacy Policy | Cookie Policy